Bunu Trend-ə müsahibəsində Azərbaycan Milli İncəsənət Muzeyinin direktoru, Beynəlxalq Muzeylər Şurasının (ICOM) Azərbaycan Komitəsinin sədri, sənətşünaslıq üzrə fəlsəfə doktoru, dosent, Əməkdar mədəniyyət işçisi Şirin Məlikova bildirib.

Festival 31 oktyabr - 2 noyabr tarixlərində Bakıda keçiriləcək və incəsənət, mədəniyyət və ekologiyanı birləşdirən möhtəşəm bir hadisə olacaq. Layihə Heydər Əliyev Fondu və IDEA İctimai Birliyi tərəfindən, Azərbaycan Mədəniyyət Nazirliyinin tərəfdaşlığı ilə təşkil olunur. Layihənin müəllifi və təşəbbüskarı isə Heydər Əliyev Fondunun vitse-prezidenti, IDEA İctimai Birliyinin təsisçisi Leyla Əliyevadır. Bu immersiv layihə Bakını müasir yaradıcılıq, dialoq və kəşflərlə yaşayan bir səhnəyə çevirəcək. Festivalda əsas diqqət sənət dili vasitəsilə okeanlar və dənizlərdəki ekoloji vəziyyətə yönəldiləcək. Festivalın əsas mövzusu - su - həyatın, yenilənmənin və davamlı inkişafın simvolu kimi seçilib. Su, həmçinin dayanıqlığın, yenilənmənin və ümumi yaddaşın simvolu olaraq "Art Weekend" konsepsiyasının əsas elementi olacaq və beynəlxalq incəsənət dünyası ilə əhəmiyyətli dialoqun qurulmasına xidmət edəcək.

Şirin Məlikovanın sözlərinə görə, festival çərçivəsində 31 oktyabrda Azərbaycan Milli İncəsənət Muzeyində "Kəsilmiş Ümid" adlı retrospektiv sərgi açılacaq. Bu sərgi milli təsviri sənətimizin görkəmli nümayəndələrindən biri, nonkonformist rəssam Tofiq Cavadovun anadan olmasının 100 illiyinə həsr olunub. Sərgidə rəssamın 90-dan çox işi - rəsm, qrafika və kitab illüstrasiyaları nümayiş olunacaq. Onların bir qismi ictimaiyyətə ilk dəfə təqdim olunacaq. Sərgidə Azərbaycan Milli İncəsənət Muzeyinin, Dövlət Rəsm Qalereyasının, "Yeni Gallery"nin və şəxsi kolleksiyaların eksponatları təqdim ediləcək. Cəmi 38 il ömür sürməsinə baxmayaraq, Tofiq Cavadov milli mədəniyyətimizdə dərin iz qoyub, onun əsərləri Azərbaycan incəsənətinin qızıl fonduna daxildir. O, zamanını qabaqlayan böyük sənətkar, sosialist realizminin çərçivələrindən kənara çıxan cəsarətli bir rəssam idi və dərin fəlsəfi düşüncələrə malik idi. Muzeyin kolleksiyasında onun əsərlərinin böyük hissəsi saxlanılır və bu yaxınlarda həmin kolleksiya rəssamın qrafika və rəsm sahəsində daha iki əsəri ilə zənginləşib. Həmin əsərlər də sərgidə nümayiş olunacaq.

Şirin Məlikova bildirib ki, muzey sənət əsərlərinin bərpasına xüsusi önəm verir və hazırda Tofiq Cavadovun Dövlət Rəsm Qalereyasına məxsus əsərləri bərpa prosesindən keçir.

O, həmçinin festivalın ümumi əhəmiyyətinə toxunaraq deyib:

"Bakıya Uçuş. İncəsənət Həftəsonu: Gələcəyi İNDİ Duy" incəsənət festivalı Azərbaycanın mədəni həyatında əlamətdar bir hadisə olacaq. Bu, təkcə tanınmış ustadların iştirakı ilə keçiriləcək böyük bir incəsənət bayramı deyil, eyni zamanda müxtəlif məkanlarda maraqlı mühazirələr, konsert proqramları, tamaşalar və digər tədbirlər təqdim olunacaq. Festival, həmçinin bəşəriyyət üçün aktual olan ekoloji məsələyə - su ehtiyatlarına - sənət vasitəsilə diqqət çəkməyi qarşısına məqsəd qoyur".