Belə ki, müharibə və 20 Yanvar hadisələri, habelə Çernobıl AES-də hərbi xidmətlə əlaqədar əlilliyi olan şəxslər Əmək və Əhalinin Sosial Müdafiəsi Nazirliyi tərəfindən minik avtomobili ilə təmin olunurlar.

Lakin Xəzər avtomobillərinin həqiqətən yalnız bu kateqoriyadan olan şəxslərə verilib-verilməməsi və ümumilikdə bazarda niyə yetərincə satılmaması da sual doğuran məsələlərdəndir.

Son.az xəbər verir ki, mövzu ilə bağlı Modern.az-a açıqlamasında Milli Məclisin İqtisadi siyasət, sənaye və sahibkarlq komitəsinin üzvü Vüqar Bayramov bildirib ki, Azərbaycanda yerli avtomobil istehsalı genişlənir və artıq yalnız Xəzər avtomobilləri deyil, eyni zamanda hibrid və elektrik avtomobillərinin istehsalı nəzərdə tutulur.

"Vergi Məcəlləsində növbəti ildən etibarən hibrid və elektrik avtomobillərinin ehtiyat hissələri üçün rüsumların müəyyənləşdirilməsi də məhz bu proseslə bağlıdır. Ümumilikdə, avtomobillərin kütləvi istehsalı bir sıra hallarda zaman tələb edir və bu səbəbdən yerli istehsal mərhələli şəkildə artmasına, bazar seqmentində öz yerini tutmasına gətirib çıxarır".

Deputat həmçinin vurğulayıb ki, yerli istehsalın dəstəklənməsi vacibdir və bu istiqamətdə təşviq siyasəti də həyata keçirilir:

"Bununla yanaşı, yerli məhsullara tələbin artması və keyfiyyət standartlarının tam tətbiqi, qorunması da önəmli məqamdır. Çünki region ölkələrinin təcrübəsi göstərir ki, avtomobil bazarında yerli istehsalın uğuru istehlakçı inamının formalaşmasından keçir".

V.Bayramov onu da əlavə edib ki, növbəti ildən yerli istehsal olunan məhsulların (avtomobillərin) sayında artımlar olacaq və bazara daha çox yerli avtomobilin daxil olması müşahidə ediləcək. Onun sözlərinə görə, bu isə nəticə etibarilə, ölkənin avtomobil parkında yerli istehsal seqmentinin genişlənməsinə şərait yaradacaq.

Qeyd edək ki, ölkəmizdə yerli avtomobil istehsalının təşkili ilə məşğul olan müəssisə "Azərmaş" ASC-dir. Hazırda ASC-nin Neftçala və Hacıqabulda avtomobil istehsalı zavodu yerləşir. Müəssisənin fəaliyyəti ilə bağlı məlumat əldə etmək üçün "Azərmaş"-ın təsisçisi ilə əlaqə saxlamağa çalışsaq da zənglərimizə cavab verməyib.