2021-2022-ci illərdə Azərbaycanda "Google"da ən çox axtarılan saytlar açıqlanıb. Metrix.az-ın yaydığı məlumatda qeyd olunub ki, göstərilən dövrdə ölkəmizdə "Google"da ən çox porno saytlar axtarılıb. 10 milyondan çox əhalisi olan Azərbaycanda porno sayta marağın bu həddə olması sual doğurur. Axtarış siyahısında ikinci yerdə isə "Google"un pulsuz tərcümə sistemi "google translate" dayanır. Statistikadan da göründüyü kimi azərbaycanlıların çoxunu maraqlandığı əsas məsələ "yataq sərgüzəştləri"dir. Ümumilikdə, saytlarda da ən çox oxunan xəbərlər kiminsə kimisə zorlaması, kiminsə xəyanətinin üstünün açılması, kimlərinsə ifşası və bu tipli xəbərlərdir. Jurnalistika baxımından bunların heç biri xəbər janrına aid deyil, lakin, informasiya xarakteri daşıyır.

İri marketlərə daxil olduqda burada həm qadın bezinin, həm çörəyin, həm də intim gellərin satıldığının şahidi olmuşuq. Kimə nə lazımdırsa gedib həmin bölmədən özü üçün vacib olan məhsulu alır. Bu sadalanan məhsulların eyni mağazada satılması həmin marketin "əxlaqsız"lığını göstərmədiyi kimi, eləcə də saytlarda da yayılan informasiya xarakterli məlumatlar onun əxlaq göstəricisi deyil.

Dünyada hər kəsin marağı, zövqü, düşüncə tərzi eyni olmadığı kimi, hamının müxtəlif olaylara reaksiyası da fərqlidir. Biri üçün deputatın açıqlaması maraqlı ola bilər, başqası üçün Şəbnəm Tovuzlunun. Bu o demək deyil ki, saytlar, televiziyalar ancaq bir məsələ barədə məlumat versin. Kimsə əgər "zorlama xəbər"ini oxuyanda həzz alıb, kimsə bundan iyrənirsə bu birbaşa həmin şəxsin özü ilə bağlı olan məsələdir. Ölkədə baş verən hər-hansı təcavüz olayının ört-basdır edilməsi heç də yaxşı nəsə vəd etmir. Əksinə, problemin həllinə mənfi təsir edə bilər. Burada əsas olan məqam necə marketdə sənə aid olmayan məhsulun yanından düz keçdiyin kimi, eynən bu məlumatlardan da yan keçməyin mümkünlüyüdür.

İsmayıl Son.az