Son.az avtomobil mütəxəssislərinin bəzi xəbərdarlıqlarını təqdim edir:

Fərqində olmadan etdiyimiz sadə səhvlər həm cibimizi yandırır, həm də avtomobilimizin ömrünü qısaldır. Avtomobil ekspertlərinin tez-tez vurğuladığı "10 dəqiqə qaydası" isə həm yanacaq qənaəti təmin edir, həm də maşının sağlamlığını qoruyur.

İsti havalarda tıxacda dayananda və ya kimisə gözləyərkən mühərriki açıq saxlamaq sadə görünə bilər. Lakin mühərrikin boşda işləməsi, xüsusən kondisioner açıq olduqda, yanacaq sərfiyyatını su kimi artırır. Mütəxəssislər deyir ki, bu vərdiş israf gətirir, qənaət yox. 10 dəqiqəlik dayanma zamanı mühərriki açıq saxlamaq avtomobilinizin litr-litr yanacağı boş yerə sərf etməsinə səbəb ola bilər.

Kondisioner kompressoru mühərrik boşda işləyərkən fasiləsiz işləyir və mühərrikə əlavə yük düşür. Bu, xüsusən şəhər içi sıx tıxacda mühərrikin daha çox aşınmasına gətirib çıxarır. Nə etməli? Qısa müddətli dayanma varsa, kondisioneri söndürüb pəncərələri bir az aralamaq yaxşı fikirdir. Uzun müddətli dayanmalarda isə mühərriki tamamilə söndürmək ən ağıllı həll yoludur.

Çoxumuz isti havada sərinləmək üçün pəncərələri açıb sürməyə davam edirik. Amma bu vərdiş düşündüyünüzdən daha böyük problem yarada bilər. Açıq pəncərələr avtomobilin aerodinamik quruluşunu pozur, hava müqavimətini artırır. Bu da mühərrikin daha çox işləməsinə və nəticədə yanacağın daha çox sərf olunmasına səbəb olur. Əvəzinə, aşağı sürətlərdə pəncərələri azca aralamaq, yüksək sürətlərdə isə kondisioneri aşağı səviyyədə işlətmək daha səmərəlidir.

Mütəxəssislər bildirir ki, əgər 10 dəqiqədən çox bir yerdə dayanacaqsınızsa, mühərriki söndürməyinizi qəti şəkildə tövsiyə edirlər. Bu sadə qayda təkcə yanacaq qənaəti təmin etmir, həm də mühərrikin həddindən artıq qızmasının qarşısını alır və uzunmüddətli istifadə ömrünü uzadır.

Yayda avtomobil idarə etmək təkcə mühərriklə bitmir. Təkər təzyiqi və yük kimi detallarda yanacaq sərfiyyatına birbaşa təsir edir. Aşağı təkər təzyiqi təkərlərin yolla daha çox sürtünməsinə səbəb olur, bu da mühərrikin daha çox işləməsini tələb edir və yanacaq sərfiyyatını artırır. Buna görə də, ayda bir dəfə təkər təzyiqinizi yoxlamaq vərdişi formalaşdıra bilərsiniz.

Avtomobilinizin müntəzəm baxımını etdirməklə mühərrikin effektiv işləməsini təmin edin. Çirkli hava filtrləri yanacaq sərfiyyatını artıra bilər. Ani sürətlənmə və sərt əyləc yanacağı artırır. Mümkünsə, sakit və yumşaq sürüş tərzi mənimsəyin. Avtomobilinizi günəş altında saxlamaq daxili temperaturu artıraraq kondisionerin daha çox işləməsinə səbəb olur. Mümkünsə, avtomobilinizi kölgəli yerlərdə park edin və ya günəşlik istifadə edin.

Kənan Son.az