Son.az-ın məlumatına görə Qastroenteroloq Yevgeni Belousov bildirib ki, bayram süfrəsində ən çox problemlərə məhz içkilər səbəb olur. Onun sözlərinə görə, bir çox içki gizli şəkər mənbəyidir və mədə-bağırsaq sistemində narahatlıq yarada bilər.

Belousov qeyd edib ki, düzgün seçilmiş içkilər süfrədəkiləri daha rahat həzm etməyə kömək olur. O, kvas, kombuça, təzə sıxılmış tərəvəz şirələri, bitki çayları, eləcə də laym və nanə əlavə edilmiş mineral suyu tövsiyə edib.

Həkimin sözlərinə görə, hətta "faydalı" kimi təqdim olunan limonadlar və şirəli içkilər belə təhlükəli ola bilər. Bir stəkanda 10-12 çay qaşığına qədər şəkər ola bilər ki, bu da ÜST-ün tövsiyə etdiyi gündəlik normanı xeyli aşır. Bu cür içkilər insulin səviyyəsinin kəskin artmasına, mədə və bağırsaq selikli qişasında qıcıqlanmaya, mikrofloranın pozulmasına səbəb ola bilər. Xüsusilə qastrit, reflüks və ferment çatışmazlığı olan insanlar üçün bu içkilər arzuolunmazdır.

Alternativ olaraq tərəvəz əsaslı şirələr məsləhət görülür. Həkim kök, xiyar və az miqdarda alma şirəsinin laym və zəncəfil əlavə edilərək hazırlanmasını tövsiyə edir. Bu qarışım həzmi yumşaq şəkildə stimullaşdırır və köpü azalda bilər. Şirələri acqarına içməmək və mineral su ilə durultmaq daha məqsədəuyğundur.

Fermentasiya olunmuş içkilər də faydalı hesab olunur. Ev şəraitində hazırlanmış kvas, şəkəri az olan kombuça və kefir tərkibli içkilər qaraciyər və bağırsaqların işinə müsbət təsir göstərir. Həkim xəbərdarlıq edib ki, mağazalarda satılan şirin kombuça içkilərində bəzən koladan da çox şəkər olur.

Bununla yanaşı, bəzi insanlar ehtiyatlı olmalıdır. Qastrit, reflüks və 2-ci tip diabeti olan şəxslərə fermentasiya olunmuş içkiləri həkimlə məsləhətləşmədən qəbul etmək tövsiyə edilmir.

İsti içkilərə üstünlük verənlər üçün bitki çayları uyğun seçimdir. Nanə və itburnu spazmları azalda, zəncəfil, darçın və sitrus qabığı isə yüngül iltihabəleyhinə təsir göstərə bilər.

Həkim sonda sadə mineral suyu da tövsiyə edib. Onun sözlərinə görə, az qazlı mineral suya laym, rozmarin və ya giləmeyvə əlavə etmək həm iştahanı yaxşılaşdırır, həm də şirin içkilərə olan ehtiyacı azaldır.

İsmayıl Son.az