Son.az Trend-ə istinadən xəbər verir ki, 10 sentyabr tarixindən etibarən kənd ərazisindəki 3, 7 və 40 mərasimlərində ehsan verilməyəcək. Əvəzində isə başsağlığına gələnlər üçün yalnız çay süfrəsi açılacaq.

Həmçinin, xüsusi vurğulanıb ki, hər hansı kənd sakini bu qaydanı pozarsa, həmin şəxsin keçirdiyi yasda sakinlər iştirak etməyəcək.

Qeyd edək ki, kənd ağsaqqallarının iştirakı ilə keçirilən yığıncaqda qəbul edilən qərar kəndin sosial şəbəkə səhifələrində paylaşılıb.

Azərbaycanda yas mərasimlərinin təmtəraqlı keçirilməsi uzun müddətdir ictimaiyyət arasında müzakirə olunur. Ehsan adı ilə açılan süfrələr təmtərağı ilə seçilir. Bir neçə il əvvəl rəsmi qurumlar tərəfindən yas mərasimlərindəki təmtərağın yığışdırılması tövsiyə olundu, buna bəzi yerlərdə əməl edilsə də, sonradan hər şey unuduldu.

Naxçıvanın kəndində tətbiq edilən qadağa bu mövzunu yenidən aktuallaşdırdı.

Məsə ilə bağlı Trend-ə açıqlama verən Milli Məclisin İctimai birliklər və dini qurumlar komitəsinin üzvü Ceyhun Məmmədov bildirib ki, bu məsələ uzun müddətdir ki, cəmiyyətdə müzakirə olunur.

"Bu məsələni Milli Məclisdə dəfələrlə qaldırmışam. Təəssüf ki, bununla bağlı hansısa ciddi nəticəyə gələ bilməmişik. Bu gün də yas məclislərində ciddi israfçılıq var. Hesab edirəm ki, buna yanaşma ciddi şəkildə dəyişməlidir. Ehsan verilməsinin ləğvi üçün ciddi addımlar atılmalıdır. Hansısa hüquqi aktın olmasına ehtiyac var. Bununla yanaşı, geniş təbliğat və maarifləndirmə işləri aparmalıyıq. Məsələnin hüquqi çərçivədə tənzimlənməsi üçün addımlar atmalıyıq. Başqa yol yoxdur. Əks halda, bu israfçılıq davam edəcək".

C.Məmmədov vurğulayıb ki, dünyada ərzaq böhranının baş verdiyi bir zamanda belə israfçılıq yolverilməzdir.

"Ehsanın islam dini ilə heç bir bağlılığı yoxdur. Din israfçılığın əleyhinədir. Əgər kimsə ehsan vermək istəyirsə, təhsil almaq imkanı olmayan şəxsə, ailə qurmaq istəyən şəxsə, uşaq və ahıllar evlərinə maddi yardım edə bilər", - deyə o qeyd edib.