Keçmiş məcburi köçkünlər üçün nəzərdə tutulmuş binalardakı mənzillərin satışa çıxarılması əmlak bazarında qiymətlərə necə təsir edəcək?

Trend-in bununla bağlı sualını cavablandıran əmlak eksperti Ramil Osmanlı təsiri cüzi qiymətləndirir.

Onun sözlərinə görə, Əmək və Əhalinin Sosial Müdafiəsi Nazirliyi həmin binaları qiymətləndirərək satışa çıxarıb.

"Belə ki, mənzillər qiymətləndirilərkən ərazi üzrə qiymətlər nəzərə alınır və təklif formalaşır. Bu baxımdan da bu mənzillərin bazara çıxarılması əmlak bazarında qiymətlərə təsir etməyəcək. Ümumiyyətlə keçmiş məcburi köçkünlərə verilən evlər tələb formalaşdıracaq. Lakin say etibarı ilə ciddi dəyişikliyə gətirib çıxarmayacaq. Tədricən məcburi köçkünlərin öz yurdlarına qayıtmasından sonra onların yaşadıqları mənzillərin də bazara çıxarılacağı gözlənilir. Amma satış hansı səviyyədə olacaq və hansı nəticəni verəcək indidən söyləmək çətindir. Çünki seçilən ərazilərdə mənzillərə tələbat yüksək deyil. Belə ərazilərdə satılan mənzillərin qiymətlərinə və şərtlərinə güzəşt təyin olunmalıdır", - R.Osmanlı qeyd edib.