Son.az xəbər verir ki, söhbət Yer kürəsində ən çox uzunömürlü insanların yaşadığı ərazilərdə - "Mavi zonalarda" hər gün yeyilən sadə, lakin təsirli bir şorbadan gedir.

Bu bölgələrə daxil olan İtaliyanın Sardiniya adası, Yaponiyanın Okinava, Yunanıstanın İkariya adası, Kosta-Rikanın Nikoya yarımadası və ABŞ-ın Loma Linda şəhəri dünyada ən sağlam və uzunömürlü insanların yaşadığı yerlər kimi tanınır.

Bu konsepsiyanın tədqiqatçısı, tanınmış yazıçı və sağlamlıq eksperti Dan Büttner qeyd edir ki, bu bölgələrdəki insanların uzun ömür sürməsində əsas amil onların həyat tərzi, xüsusən də təbii və bitki mənşəli qidalara əsaslanan qidalanma rejimidir.

Uzunömürlülüyün "gizli silahı": Minestrone şorbası

Sardiniyada demək olar ki, hər gün istehlak edilən minestrone şorbası bu bölgənin uzunömürlü sakinlərinin rasionunda mühüm yer tutur. Tərkibində mərcimək, lobya, yerkökü, kərəviz, ispanaq və digər tərəvəzlər olan bu lifli və qidalandırıcı şorba iltihab əleyhinə təsiri, antioksidant zənginliyi və ürək sağlamlığını dəstəkləməsi ilə tanınır.

Dan Büttner bildirir:

"Sardiniyalılar minestronenin gücünə inanır. Bu şorba təkcə dadlı deyil, həm də orqanizmin yaşlanma prosesini ləngidə bilən təbii maddələrlə zəngindir. Hər gün bir kasa minestrone həm toxluq hissi verir, həm də qan təzyiqi və şəkər səviyyəsinin normallaşmasına kömək edir."

Evdə hazırlanması olduqca asandır

İnqrediyentlər:

Zeytun yağı (birinci soyuq pres) Soğan, yerkökü, kərəviz Sarımsaq, dəfnə yarpağı Pomidor pastası Kartof Quru mərcimək Cannellini lobyası (konserv və ya əvvəlcədən bişmiş) Tərəvəz bulyonu Parmesan pendirinin qabığı (isteyəyə bağlı) Bərk buğda unundan hazırlanmış makaron Təzə ispanaq

Hazırlanma qaydası:

Dərin qazan içində xırda doğranmış soğan, yerkökü və kərəvizi zeytun yağında qovurun. Üzərinə bir-iki dəfnə yarpağı və az miqdarda duz əlavə edin. Daha sonra sarımsağı və pomidor pastasını əlavə edib, bir neçə dəqiqə bişirin. Ardınca kartof və mərciməyi tökün, tərəvəz bulyonu ilə qarışdıraraq bişirin. İstəyə görə, parmesan qabığını da əlavə edə bilərsiniz.

Mərcimək yumşaldıqdan sonra lobyaları və az miqdarda makaronu əlavə edin. Bişməyə az qalmış ispanağı da qarışığa qatın. İstəyirsinizsə, şorbanın bir hissəsini blenderdən keçirərək daha kremvari tekstura əldə edə bilərsiniz.

Servis zamanı bir neçə damcı zeytun yağı və istəyə görə rəndələnmiş pendirlə bəzəyərək süfrəyə verin.

Uzunömürlülüyə doğru bir addım

Sadə, sərfəli və sağlam olan bu şorba yalnız doyurucu bir yemək deyil, həm də bədənə uzunmüddətli faydalar verə biləcək təbii bir "resept"dir. Uzunömürlülüyü və həyat keyfiyyətini artırmaq istəyənlər üçün minestrone, "Mavi zonalar"dan gələn real və təsdiqlənmiş cavabdır.

Kənan Son.az