Fərid Şahbazlı: “150 illik milli mətbuat yolu Vətənə xidmətin şərəfli tarixidir”

Digərləri 18 İyl 2025 18:12:00 85 0

"Bir neçə gün sonra Azərbaycan Milli Mətbuatı 150 illik şərəfli və zəngin bir yolu arxada qoyur. 1875-ci ildə Həsən bəy Zərdabinin nəşr etdirdiyi "Əkinçi" qəzeti ilə başlayan bu yol, sadəcə bir mətbuat tarixçəsi deyil, xalqın maariflənməsi, milli özünüdərk və ictimai düşüncənin formalaşması prosesidir. "Əkinçi" ilə başlanan bu oyanış sonralar "Füyuzat", "Molla Nəsrəddin", "İrşad" kimi nəşrlərlə davam etdirildi və mətbuat xalqın vicdan səsi, haqq tribunası rolunu üzərinə götürdü".

Bu xəbəri də oxu: Leyla Əliyeva “Məlhəm Hospital”ı ziyarət edib

Bu fikirləri Editor.az İnformasiya Portalının baş redaktoru, siyasi şərhçi Fərid Şahbazlı deyib.

Onun sözlərinə görə, Sovet senzurasının sərt şəraitində belə Azərbaycan jurnalistikası milli dəyərləri yaşatmağa, cəmiyyətə işıq tutmağa davam edib. Müstəqillik illərində isə milli mətbuat azadlığın və məsuliyyətin yeni mərhələsinə qədəm qoydu. Bu gün media təkcə xəbər verən vasitə deyil, informasiya savaşında milli maraqları qoruyan, cəmiyyətin inkişafına töhfə verən mühüm institutdur: "Qlobal informasiya müharibələrinin getdikcə dərinləşdiyi bir dövrdə Azərbaycan jurnalistləri də öz peşə borclarını müasir çağırışlara uyğun şəkildə yerinə yetirirlər. Onlar dezinformasiyalara qarşı həqiqəti axtaran, ictimai rəyə ədalətli yön verən və etibarlı informasiya mənbəyi kimi çıxış edirlər. Bu prosesdə jurnalistlər cəmiyyətin təhlükəsizlik dayaqlarından birinə çevriliblər".

Fərid Şahbazlı bildirib ki, Azərbaycan jurnalistləri üçün vətənə sədaqət, xalqın mənafeyinə xidmət və obyektivlik əsas prinsiplər olaraq qalır: 'Media təmsilçiləri öz peşələrini sadəcə bir iş kimi deyil, həm də bir vicdan missiyası kimi qəbul edirlər. 44 günlük Vətən müharibəsi bunu bir daha sübut etdi ki, jurnalistlər təkcə informasiya daşıyıcısı deyil, Vətənin əsgərləri oldular. Onların informasiya cəbhəsində göstərdiyi fədakarlıq və qətiyyət gələcək nəsil media nümayəndələri üçün nümunəvi örnəyə çevrildi".