Bunu Son.az-a açıqlamasında politoloq Şəbnəm Həsənova deyib.

O bildirib ki, Ermənistan Laçın yolunda 19 gündür davam edən aksiyanı beynəlxalq gündəmə daşımaqla məsələlərin arealını genişləndirməyə can atır:

"Hələ başqa məsələlər bir kənara qalsın, bu məqamın özü Ermənistanın bir dövlət kimi qeyri-ciddi aktor olduğundan xəbər verir. Bunu sübut edən amil Rusiya tərəfindən də Ermənistana gələn kəskin tənqidlərdir ki, Rusiya Xarici İşlər Nazirliyinin sözçüsü Mariya Zaxarova Paşinyanın yer üzündəki reallıqları anlamadığını bildirdi. Bu, bir tərəfdən Paşinyanın siyasi prosesləri dərk etmək baxımından kifayət qədər kompetent sayılmadığının göstəricidirsə, ikinci tərəfdən də Rusiyanın Ermənistana barmaq sallamasıdır ki, sənin də aqibətin xoş olmaya, uçqunlar altında qala bilər. Peskovun Qriqoryanın bəyanatlarını təxribatçı adlandırması da bura daxil. 

Sözü ilə əməli üst-üstə düşməyən bir dövlətin son məqamda hansı qərar verə biləcəyi və hansı aktoru təhlükə altına sala biləcəyi məlum olmadığından Ermənistana güvənilmir. Bu baxımdan Türkiyə də Laçın yolunda baş verən son hadisələri Ermənistan üçün səmimiyyət sınağı hesab edir. Ermənistan atmış olduğu addımlarla, vermiş olduğu bəyanatlarla bir daha özünün qeyri-ciddi aktor olduğunu təsdiq edir. Çavuşoğlunun bu fikirləri habelə Rusiya və Qərb cəbhəsində Ermənistan haqqında mövcud olan təsəvvürün aydın təzahür formasıdır. 

Bütün bu reallıqlar fonunda, zənnimcə, Ermənistanı məyus edən ən önəmli məsələ isə Makronun Paşinyana Ermənistanı qoruya bilməyəcəyi haqqında xəbərdarlıq etməsidir ki, Makron Paşinyana KTMT-dən çıxmamağı tövsiyə edib. Hər halda bunu biz yox, "kiçik bacının" (Ermənistan) KİV-ləri yazır. Sadəcə Paris deyil, ABŞ da Ermənistanın təhlükəsizliyinin təminatçısı rolunu öz üzərinə götürə bilmədiyini bildirir. Bu, bir daha ondan xəbər verir ki, Ermənistan hansısa fövqəl qüvvənin onları xilas etməyəcəyini anlamalıdır. Dövlətlərin hər biri proseslərə öz siyasi və iqtisadi maraqları kontekstindən yanaşır, bu maraqları təmin etmək istiqamətində Ermənistan onlara bəzən lazım olur. Lazım olmayanda, Azərbaycanla təkbətək qalanda da nələr oldu bunu dünya gördü. Yəni, biz onsuz da məlum olanı sübut edirik.

Ermənistanın bir tərəfdən aldığı direktivlər digər cəbhəni məmnun etmədikdə radikal dəyişkənliyə gedir ki, təzyiqlər də paralel olaraq artır. Ermənistan növbəti ildə pozucu əməllərindən çəkinməli, atacağı addımlarda fərqli cəbhələri deyil, öz xalqının aqibətini düşünməlidir.  Bütün bunların əksinə olaraq və Ermənistanın abstrakt davranışları fonunda Azərbaycan Prezidenti cənab İlham Əliyev aydın vizyon ortaya qoyur, müstəqil siyasət yürüdərək məsələlərə öz milli maraqlarımız çərçivəsindən baxır. Düşünürəm ki, dövlətlər də Azərbaycan və Ermənistan arasında ciddi fərqi görür. Ermənistanın vaxt uzatmağa getdiyi bir zamanda istənilən pozucu addımı öz əleyhinə işləyir, legitimliyi ciddi şübhə altına düşür, Ermənistanı protektorat altına almaq səyləri daha da genişlənir.

O ki qaldı BMT sülhməramlı qüvvələrinin regiona gətirməyə dəvətə bu, Ermənistanın ənənəvi taktikasıdır ki, məsələlərin arealını genişləndirsin, bu müddət ərzində də hərədən-bir mədət umsun. Düşünürəm ki, Azərbaycan isə heç bir genişlənməyə yol vermədən qısa zaman çərçivəsində və dar bir rakursda bu məsələri regional səviyyədə həll etmək, zəhərli tendensiyaları elə yerindəcə boğmaq istəyir.

Görünən odur ki, məsələlərdə Rusiya və Azərbaycan yaxın mövqeyə malik olduqları qədər, bu məsələdə isə eyni baxışı bölüşür. Hər halda Ermənistanın görüşə getməməsi, hətta ən son əldə oluna biləcək razılaşmalardan belə kənarda qalması Moskva-Bakı arasında şifahi də olsa müəyyən razılıqların olmasına daha da təkan verdi. 

Ermənistan ayıq-sayıq siyasət yürütsə bölgədə hansısa konkret məqsədli və müxtəlif məramlı qüvvəyə və aktora ehtiyac qalmaz. Ən önəmlisi isə, Azərbaycan ordusu mərhələli olsa belə nəzarət zonalarına qətiyyətlə yerləşir".

Təhməz Əsədov Son.az