Seyid Əzim Şirvaninin 190 illiyi münasibətilə ədəbibədii gecə keçirilib FOTO

Kriminal 29 Noy 2025 15:50:00 79 0

Beynəlxalq Muğam Mərkəzində Mədəniyyət Nazirliyinin təşkilatçılığı ilə böyük mütəfəkkir şair Seyid Əzim Şirvaninin 190 illiyi münasibətilə ədəbi-bədii gecə keçirilib.

Tədbirdə çıxış edən yazıçı-dramaturq İlqar Fəhmi Seyid Əzim Şirvaninin ədəbi irsi, maarifçi fəaliyyəti və XIX əsr Azərbaycan poeziyasında oynadığı mühüm roldan söz açıb.

Mədəniyyət Nazirliyinin Kitab sənayesi şöbəsinin müdiri Vasif Qurbanzadə Azərbaycan ədəbiyyatı və mədəniyyətini təbliğ etməyin böyük məsuliyyət daşıdığını bildirib. O vurğulayıb ki, tarixən bu istiqamətdə fundamental addımlar atılıb və milli mədəniyyətə sahib çıxmaq, onu dünya ictimaiyyətinə doğru şəkildə təqdim etmək hər birimizin borcudur.

S.Ə.Şirvani nəslinin davamçısı, Milli Məclisin deputatı Şahin Seyidzadə qeyd edib ki, Seyid Əzim Şirvani xüsusi icazə ilə Şamaxıda məktəb açıb, müəyyən məhdudiyyətlərə baxmayaraq həm Azərbaycan, həm də rus dillərində tədrisin təşkilinə nail olub. Şahin Seyidzadənin sözlərinə görə, Seyid Əzimin şeirlərinin muğamlarda ifa olunması onların daha geniş kütlələr tərəfindən sevilməsinə səbəb olub.

Gecədə çıxış edən millət vəkili Elnarə Akimova, filologiya üzrə fəlsəfə doktoru Firudin Qurbansoy, elmlər doktoru Vaqif Yusifli, ədəbi tənqidçi Əsəd Cahangir və digər çıxışçılarSeyid Əzim Şirvaninin zəngin irsindən söz açıblar.

Tədbirin bədii hissəsində Əməkdar incəsənət xadimi Aqil Məlikov, xanəndələr Zeynal Əhmədov, Rais Niftəliyev və Elbrus Niftəliyev, Nisbət Sədrayeva, Nişanə Baxışova və Rəvan Qaçayev şairin qəzəllərindən ibarət muğam parçaları səsləndiriblər. Xanəndələri Altay Niftəliyev (tar) Araz Ağaverdiyev (kamança), Məhta Məmmədəlizadə (qanun), Emin Cəbrayılov (nağara), Rafael Əsgərov (balaban) müşayiət edib.

Tədbirin bədii hissəsində qiraətçi Hüseynağa Aslanov şairin qəzəllərindən nümunələr, gənc şairlər Elşən Qədri və Gülbala Dadaş Seyid Əzim Şirvaniyə nəzirələrini söyləyərək gecənin ədəbi ovqatını tamamlayıblar.

İnformasiya dəstəyi - Trend.Az, Day.Az, Son.az