Çoxsaylı analitiklər, ekspertlər bəyan edirlər, yazırlar və deyirlər ki, sən demə, Rusiya Federasiyası ilə Qərbin maraqları bu məsələdə toqquşur: onlar qarabağlı ermənilərə "humanitar yardım" müstəvisində fərqli siyasət yürüdürlər və s.

Əsla belə deyil. Hazırda Rusiya ilə Qərbin faktiki olaraq, eyni oyun oynadıqlarını görürəm. Özü də bu birgə oyun Azərbaycana qarşıdır. Ağdam-Xankəndi marşrutunun işə salınma ehtimalı, bu marşrutla qarabağlı ermənilərə yanacaq, ərzaq və s. daşınması perspektivi Rusiya ilə yanaşı, Qərbi də çox narahat edir. Rusiya və Qərbin bəyanatlarına, "Ağdam-Xankəndi yolunun istifadəyə verilərək paralel marşruta çevrilməsində maraqlıyıq" tipli açıqlamalarına inanmaq olmaz.

İnansaq, sadəlövhlük edər, ciddi yanlışlığa yol verərik. Qarabağ məsələsində Qərblə Rusiyanın mövqeləri tam fərqli, diametral əks olsa da, son günlərdə onların maraqları eyni istiqamətdədir. Rusiya və Qərb əmindilər ki, Ağdam-Xankəndi yolu ilə Rusiya Qızıl Xaç Cəmiyyətinin yük avtomobili hərəkət edərək Xankəndiyə yollanan kimi Beynəlxalq Qızıl Xaç Komitəsi yük maşınlarını Laçın yolu ilə Xankəndiyə yollayacaq.

Dərhal, təcili qaydada.

Lakin Bakı bu oyuna getmədi.

Şərtlərimizi bir daha təkrar edirəm: Rusiyanın humanitar yüklü maşını YALNIZ Ağdam-Xankəndi yolu ilə hərəkət edə bilər. BQXK-nın humanitar yardımlı yük maşınları isə Ağdam-Xankəndi və Laçın yolu ilə EYNİ VAXTDA, PARALEL hərəkət edirlər. Üstəlik, Laçın yolunda bütün nəqliyyat vasitələri sərhəd və gömrük nəzarətindən KEÇƏCƏK. BQXK Ağdam-Xankəndi yolunu qulaqardına vura bilməz. Situasiya tragikomikdir: Rusiya və Qərb eyni vaxtda, unison qaydada, üstüörtülü şəkildə Bakını "öhdəliklərə riayət etməmək"də suçlamağa başlayıblar. 

Ağdam-Xankəndi yolu ilə BQXK maşınlarını buraxmağa hazırıq. Amma qarabağlı erməni separatçıları yolu bağlayıblar, keçidə imkan vermirlər. Əzizlər, zahirən mürəkkəb görünsə də, çox sadə, primitiv vəziyyətdir: Qərb rusların Ağdam-Xankəndi yolu ilə hərəkətinin qarşısını alır, Rusiya da Qərbin Laçın yolundan yararlanmasına imkan verməmək üçün Ermənistandakı və Xankəndindəki agenturasını işə salıb. Həmin agenturanın başında isə Ruben Vardanyan durur.

İdiotizmə baxın: Rusiyanın Xankəndinə ünvanladığı yükün hərəkətinə mane olanları yola Rusiyanın marioneti Vardanyan çıxarıb.

Moskvanın bəsit strategiyası, Qərbin isə ikiüzlü taktikasının incə və zərif ssenari olacağını gözləməyin.

Hər iki qüvvə istədiyinə nail olmaq üçün bütün vasitələri işə salıb.

Amma unudublar ki, bu vasitələrdən əvvəlcədən xəbərdarıq.

Hər şey yaxşı olacaq.

Vətən sağ olsun!

Elçin Alıoğlu