Son.az ictnews.az-a istinadən bildirir ki, məhz 2016-cı ildə Çin hakimiyyəti süni intellekt sistemlərinin prioritet inkişaf planına daxil edilməsini bəyan edib. O vaxtdan bu sahədə ixtisaslaşan gənc şirkətlər 30 milyard dollara yaxın investisiya cəlb ediblər. Müqayisə üçün qeyd edək ki, 1998-2020-ci illərdə ölkədə bu fəaliyyət istiqaməti 35 milyard dollar cəlb etməyə nail olub. Beləliklə, süni intellekt sahəsində Çin startaplarının əldə etdiyi vəsaitlərin 86 faizi məhz son dörd ildə cəlb olunub.

Bu vəsaitlərin üçdəbir hissəsi Pekində yerləşən şirkətlərin payına düşüb. Burada ölkənin yeni fəaliyyətə başlayan şirkətlərə dəstək olan aparıcı akademik müəssisələri yerləşir. İkinci yerdə investisiyaların həcminə görə Pekindən təxminən 2,5 dəfə geri qalan Şençjen qərarlaşıb. Şanxay isə süni intellekt sahəsinə investorların cəlb edilməsi üzrə liderlər üçlüyünü tamamlayıb. Hazırda Çində 1 milyard dollardan çox potensial kapitallaşmaya malik 100-ə yaxın özəl şirkət fəaliyyət göstərir. Bu şirkətlərin əsas hissəsi süni intellekt sahəsində işləmələrlə əlaqədardır.

Növbəti beşillik planına ölkə hakimiyyəti tərəfindən yarımkeçiricilər sektoru üçün maliyyə dəstəyinin daxil edilməsi nəzərdə tutulur. Növbəti onilliyin ortalarınadək Çin ərazisində 7 nanometrlik texnologiya üzrə yarımkeçirici komponentlərinin buraxılışının mənimsənilməsi planlaşdırılır.