Avqustun 14-də, saat 15:00-da “Səba” ASC-nin səhmdarlarının növbəti ümumi yığıncağı keçiriləcək.

“Report” xəbər verir ki, bununla bağlı səhmdar cəmiyyətinin Direktorlar Şurası qərar qəbul edib.

Qərara əsasən, yığıncaq şirkətin Abşeron rayonu, Xırdalan şəhəri, Heydər Əliyev prospekti, 1 ünvanında yerləşən inzibati binasında olacaq.

Yığıncağın gündəliyinəCəmiyyətin 2019-cu ildəki fəaliyyəti ilə bağlı maliyyə hesabatın təsdiq edilməsi, “Xalq Bank”la 3 il müddətinə bağlanmış 15 Avqust 2017-ci il tarixli kredit müqaviləsinin müddətinin 24 ay - yəni 15 Avqust 2022-ci il tarixə qədər uzadılması (kreditin ödəniş şərtlərinin dəyişdirlməsi ilə bağlı restruktrizasiya olunması) və digər məsələlər daxildir.

Xatırladaq ki, "Səba" 1997-ci ildə yaradılıb. Onun nizamnamə kapitalı 4,8 milyon manatdır. Cəmiyyətinin səhmlərinin 37,3%-i Hidayət Quliyevə, yenə də 37,3%-i "Baku Investment Company" MMC-yə, 25%-i İqtisadiyyat Nazirliyinə məxsus "Azərbaycan İnvestisiya Şirkəti" ASC-yə, 0,4%-i isə digər 11 fiziki şəxsə məxsusdur.